काठमाडाैं – विदेश जानेहरूलाई जुनसुकै वेला पनि राजधानीका चार अस्पतालमा कोभिड-१९ विरुद्धको खोप लगाइने भएको छ । स्वास्थ्य तथा जनसङ्ख्या मन्त्रालयले विदेश जानेहरूका लागि खोप लगाउन चार अस्पताल तोकिएको जनाएको छ ।
छाउनीको वीरेन्द्र सैनिक अस्पताल, महाराजगञ्जको नेपाल प्रहरी अस्पताल, बलम्बुको सशस्त्र प्रहरी अस्पताल र टेकुको शहीद शुक्रराज ट्रपिकल तथा सरुवारोग अस्पतालमा निःशुल्क खोप लगाउन पाइनेछ । चारै अस्पतालमा जोन्सन एन्ड जोन्सन खोप लगाइनेछ । यो खोप एक डोज लगाए पुग्छ । खोप लगाउन पासपोर्ट र भिसा देखाउनुपर्नेछ ।
अहिले देशभर खोप अभियान सञ्चालन भइरहेको छ । विभिन्न उमेर समूहसँगै १२ देखि १७ वर्षसम्मका बालबालिकालाई फाइजर र मोडर्ना खोप लगाउन थालिएको छ । विद्यार्थीलाई विद्यालयमै खोप लगाउन थालिएको छ । स्वास्थ्य मन्त्रालयका अनुसार, अहिलेसम्म दुई करोड ३१ लाख ७१ हजार ९७७ डोज खोप लगाइसकिएको छ ।
जसमा एक करोड ३१ लाख ७५ हजार ५९७ जनाले पहिलो डोज र ९९ लाख ९६ हजार ३८० जनाले पूर्ण खोप लगाइसकेका छन् । यससँगै सरकारले ५ देखि ११ वर्षसम्मका बालबालिकालाई फाइजर खोप लगाउन खरीद प्रक्रिया थालेको छ । उनीहरूका लागि ८४ लाख खोप ल्याइने भएको छ ।
