टोकियो – जापानको ‘सुसाइड फरेस्ट’ नामले कुख्यात-आओकिगाहारा जंगलमा शब पाउनु सामान्य कुरा हो र त्यहाँ हरेक वर्ष दर्जनौं मानिसहरुले आत्महत्या गर्ने गर्दछन् यो जंगल टोकियोबाट करिब १ सय किलोमिटर टाढा माउन्ट फुजीको उत्तरपश्चिमी बेस क्याम्प नजिकै रहेको छ । त्यहाँ हरेक बर्ष ५० देखि १ सय मानिसहरुले आत्महत्या गर्दछन् । यो जंगलमा यति ठूला र घना रुख रहेका छन् कि वनमा बाटो विराउने घटना त्यहाँको दुखद इतिहास बनेको छ । त्यहाँ मोबाइलले समेत काम गर्दैन ।
यो जंगलमा ठूलो संख्यामा मानिसहरु आएर आत्महत्या गर्ने गरेकाले यस जंगललाई सुसाइड फरेस्ट अर्थात आत्महत्याको जंगल भन्ने गरिन्छ । यो जंगल जापानको फूजी पर्वतको समथर भू-भागमा ३० वर्ग किलोमिटर क्षेत्रमा फैलिएको छ ।
जापानका मानिसहरुलाई यो जंगलमा ज्यान दिन १९६० मा छापिएको सेइचो माट्सुमोतोको कथा ‘कुरोई जुकाई’ (द ब्ल्याक सी अब ट्रिज) को कथाले भयावह प्रभाव पारेको मानिन्छ । सो कथाको अन्त्यमा एक प्रेम जोडी आओकिगाहारा जंगलमा आएर ज्यान दिन्छन् ।
सर्वेक्षण अनुसार उक्त रोमान्टिक इमेजरीले प्रेरित भएर यो जंगलमा आत्महत्या गर्न आउनेको संख्या धेरै भेटिएको थियो ।
जापानको लोककथाहरुमा जंगलमा भूत-प्रेतको छाया परेको बताइन्छ ।
ओकिगाहारा जंगलमा आत्महत्या रोक्नका लागि देशको प्रशासनले सक्दो प्रयासहरु गरिरहेको छ ।
