टोकियो – जापानको जन्मदरमा लामो समयदेखि गिरावट आएको छ । जापानमा संसारकै कममध्ये जन्मदर छ जसलाई बढाउन दशकौँदेखि सरकार सङ्घर्षरत छ । सन् २०१९ मा जापानमा प्रजननदर १२ वर्षयताकै सबैभन्दा कम थियो । झन् अहिले कोरोनाभाइरसका कारण आर्थिक सङ्घर्ष गर्नुपर्ने अवस्थाले विवाह गरेर परिवार बनाउने निर्णय गर्नु गाह्रो बनाएको छ ।
जापानी दम्पतीहरू परिवार विस्तार गर्ने कुरामा सतर्क छन् । उनीहरु पूर्ण रूपमा आर्थिक स्थिरता निश्चित नभई बच्चा जन्माउन नचाहने गर्दछन् । महामारीको यो समयमा काम र आय सुरक्षा नहुँदा जापानका नागरिकहरूले सन्तान पाउने योजना स्थगित गरिरहेकोमा सरकारलाई चिन्तित बनाएको छ ।
संसार कै सबैभन्दा बढी जनसंख्या भएको शहर टोकियोमा जन्मदर २०२० मा पनि व्यापक कमी देखिएको छ । यसका साथै अप्रिल देखि अक्टोबर बीचमा टोकियोमा गर्भवती हुनेहरूको संख्या केवल ६० हजार रेकर्ड भएका छन् । जुन अघिल्लो वर्षको तुलनामा १० प्रतिशतले घटेको संख्या हो । सन् २०२० को तथ्यांकले जनसंख्या वृद्धि नकारात्मक हुने देखिएको त्यहाँका सञ्चार माध्यमले जनाएका छन् ।
यसै कारण राजधानीमा बच्चा जन्माउन प्रोत्साहनस्वरूप आर्थिक सहायता प्रदान गर्ने नीति अघि सारिने भएको छ । योजनामा बच्चा जन्माउने अभिभावकलाई एक लाख येन उपलब्ध गराउने व्यवस्था रहने छ ।
यो प्रस्ताव फेब्रुअरीमा टोकियो महानगर सभाको बैठकमा पेश गर्ने कार्यक्रम छ, र यदि स्वीकृत भएमा आउँदो वसन्तदेखि लागू गरिने लक्ष्य राखिएको जानकारी छ ।
धेरै एशियाली मुलुकले प्रजननदरमा यस्तै समस्याको सामना गर्दै आएका छन् र कोरोनाभाइरस महामारीका बेला यो समस्या झन् दयनीय हुन सक्ने बताइन्छ ।***
