भण्डारीको पार्टी घोषणा गर्न राष्ट्रिय भेला आजदेखि सुरु

काठमाडौ – नयाँ पार्टी घोषणा गर्न मधेसवादी नेता शरतसिंह भण्डारीले बुधबार र बिहीबार राजधानीमा बोलाएको राष्ट्रिय भेलामा २७ जिल्लाबाट करिब दुई हजार पाँच सय अगुवा कार्यकर्ता सहभागी हुने भएका छन् ।

भण्डारीले २९ जेठमा काठमाडौंमा पत्रकार सम्मेलन गरेर कार्यकर्ता भेला डाकी नयाँ पार्टी घोषणा गर्ने बताएका थिए ।

बुधबार र बिहीबार दुई दिन हुने भेलामा तराई-मधेसका २३ जिल्ला, उपत्यकाका काठमाडौं, भक्तपुर र ललितपुर तथा पाल्पाबाटसमेत कार्यकर्ता सहभागी हुनेछन् ।

राष्ट्रिय सभागृहमा हुने भेलाको पहिलो दिन उद्घाटनलगायत पार्टी विधान, अवधारणालगायतका विषयमा छलफल हुने र दोस्रो दिन पार्टी घोषणा हुने जानकारी उनले दिए ।

मधेसी जनअधिकार फोरम (लोकतान्त्रिक) ले अनुशासन उल्लंघनको आरोप लगाएर गत २३ जेठमा भण्डारीलाई पार्टीबाट निष्कासन गरेको थियो ।