काठमाडाैं – एशिया कप छनोटका लागि नेपाली क्रिकेट टोलीको प्रारम्भिक छनोट गरिएको छ । मुख्य प्रशिक्षक जगत टमाटा र कप्तान पारस खड्काले १९ सदस्यीय प्रारम्भिक टोलीको घोषणा गरेका हुन् ।
१९ सदस्यीय टोलीमा अनुभवी खेलाडीहरु शरद भेषावकर र शक्ति गौचन परेका छैनन् । भेषावकर नेदरल्याण्ड्सविरुद्धको अन्तर्राष्ट्रिय एकदिवसीय खेलका क्रममा दायाँ हातको कान्छी औंलामा चोट लागेका कारण कम्तिमा चार साता मैदान बाहिर रहने भएका छन् ।
नेपाली टोलीले आगामी साउन २९ गतेदेखि बन्द प्रशिक्षण सुरु गर्नेछ । मलेसियामा हुने एशिया कप छनोटका लागि १५ सदस्यीय टोली घोषणा हुनेछ । नेपाली टोलीको ब्याटिङ कन्सल्ट्यान्टको रुपमा भारतीय प्रशिक्षक अपूर्व देसाई आउने निश्चित भएको छ । उनी साउन २९ गते नेपाल आइपुग्नेछन् । मलेसिया जानुअघि नेपालले भदौ ४ गते ३ अभ्यास खेल र बैदेशिक तयारीका लागि श्रीलंका भ्रमण गर्नेछ ।
यी हुन् छनोटमा परेका १९ खेलाडीहरू
- पारस खड्का
- अनिलकुमार साह
- बसन्त रेग्मी
- बिनोद भण्डारी
- दिपेन्द्र सिंह ऐरी
- ज्ञानेन्द्र मल्ल
- करण केसी
- किशोर महतो
- ललित भण्डारी
- ललितनारायण राजबंशी
- आरिफ शेख
- प्रदिप ऐरी
- रोहित कुमार पौडेल
- सागर पुन
- सन्दिप लामिछाने
- सोमपाल कामी
- सुबास खकुरेल
- सुनिल धमला
- सुशन भारी
आगामी साउन २९ बाट बन्द प्रशिक्षण सुरू हुने छ। त्यसपछि अन्तिम १५ सदस्यीय टोलीको छनोट हुने भएको छ ।
भदौ १३ देखि २१ गतेसम्म हुने एशिया कप छनोटमा नेपालसँगै हङकङ, ओमान, मलेसिया, सिंगापुर र युएई छन् । यस प्रतियोगिताको विजेता टोलीले एशियाकपमा स्थान बनाउनेछ । जहाँ एशियाका टेष्ट मान्यताप्राप्त पाँच टोलीहरु भारत, बंगलादेश, पाकिस्तान, श्रीलंका र अफगानिस्तान छन् । एसिया कप सेप्टेम्बर १५ देखि २८ सम्म युएईमा आयोजना हुँदैछ ।
छनोट प्रतियोगितामा नेपालले पहिलो खेल भदौ १३ गते ओमानसँग खेल्नेछ । त्यस्तै भदौ १४ गते युएईसँग, १६ गते मलेसियासँग, १७ गते सिंगापुरसँग र १९ गते हङकङसँग खेल्दैछ । राउण्ड रोविन लिगमा शीर्ष दुई स्थानमा रहने टोलीले उपाधिका लागि प्रतिस्पर्धा गर्नेछ । उपाधि विजेताले एशिया कपको समूह ए मा भारत र पाकिस्तानसँग खेल्नेछ ।
