काठमाडौ – माओवादीका अध्यक्ष पुष्पकमल दाहालले जेठ १४ गतेभित्रै नेपालको नयाँ संविधान निर्माण हुने बताएका छन् । आफ्नै निवास लाजिम्पाटमा शनिबार संयुक्त राष्ट्रसङ्घका महासचिव वान कि मुनका विशेष प्रतिनिधि स्यामुअल ताम्राटलगायतको प्रतिनिधिमण्डलसँगको भेटमा उनले उक्त कुरा बताएका हुन् ।उनले राजनीतिक दलहरुबीचमा गत बिहीबार भएको पाँचबुँदे सहमतिले सहमतिको सरकार गठन हुने वातावरण बनेको र सो सहमतिले संविधान लेखनको कामलाई समेत अगाडि बढाउनका लागि सहजता प्रदान गरेको बताउनुभएको अध्यक्ष दाहालका सहयोगी शिव खकुरेलले जानकारी दिए ।
भेटमा विशेष प्रतिनिधि ताम्राटले शान्तिप्रक्रिया र संविधान निर्माणका लागि अध्यक्ष दाहालले खेल्नुभएको सकारात्मक भूमिकाको प्रशंसा गरेका थिए ।
उनले अध्यक्ष दाहालको नेतृत्वमा नेपाल विकास र आर्थिक उन्नतिको दिशामा अगाडि बढ्ने र राजनीतिक स्थिरता प्राप्त हुने विश्वास व्यक्त गरेका थिए ।
भेटमा ताम्राटले संयुक्त राष्ट्रसङ्घका महासचिव वान कि मुनले छिट्टै नेपालको भ्रमण गर्न चाहेको बताउँदै केही समय अगाडि स्थगित गरिएको भ्रमण नेपालको कारण नभई महासचिवको कार्यव्यस्तताकै कारण भएको जानकारी गराएका थिए ।
नेपालको शान्तिप्रक्रियाले गति लिएकोमा खुसी व्यक्त गर्दै ताम्राटले संविधान निर्माणको कामलाई पनि आगामी जेठ १४ गतेसम्म नै पूरा हुनेमा संयुक्त राष्ट्रसङ्घले विश्वास लिएको बताएका थिए ।
भेटमा संयुक्त राष्ट्रसङ्घका आवासीय प्रतिनिधि रोवर्ट पाइपरलगायतको उपस्थित रहेको थियो ।
