काठमाडौं- एमाले नेता भीम रावलले अब बन्ने राष्ट्रिय सहमतिको सरकारमा एमाले सहभागी हुने दाबी गरेका छन् ।आज रिपोर्टर्स क्लब नेपालमा आयोजित साक्षात्कार कार्यक्रममा नेता रावलले पार्टीले पाँचबुँदे सहमतिलाई स्वीकार गरिसकेकाले सरकार नजाने प्रश्नै नभएको बताए ।
‘प्रमुख दलहरुबीच भएको पाँचबुँदे सहमतिमा एमालेले हस्ताक्षर गरिसकेको छ,’ उनले भने- राष्ट्रि सहमतिको सरकारका निम्ति एमालेले दुई, दुई पटक प्रधानमन्त्री पदत्याग गरेकाले अब सरकारमा नजाने प्रश्नै छैन ।
पार्टी केन्द्रीय कमिटीमा छलफल नटुंगिँदासम्म एमाले सरकारमा नजाने निष्कर्ष निकाल्नु हतार हुनेछ ।
नेता रावलले पाँचबुँदे सहमतिमा विदेशी चलखेल भएको भन्ने आरोपको खण्डन पनि गरे । ‘विशेष समितिको सचिवालयमा भएको बैठकमा मध्यराति अन्तिम समयसम्म म आफैं थिएँ,’ उनले भने, ‘त्यहाँ मैले कुनै विदेशी देखिनँ । कसैले कोही विदेशी देखेको भए भनिदिनोस् ।’
