काठमाडौं– प्रधानमन्त्री डा. बावुराम भट्टराई र नेपाली कांग्रेसका सभापति सुशील कोइरालाबीच शनिबार बिहान भेटवार्ता भएको छ ।
सहमतिको राष्ट्रिय सरकारलाई शनिबार साँझसम्म पूर्णता दिने विषयमा केन्द्रित रहेर उहाँहरु विच छलफल भएको छ । भेटमा सभापति कोइरालाले शनिबार साँझ सम्म आफ्नो पार्टीबाट सरकारमा सहभागी हुने मन्त्रिहरुको नाम पठाइसक्ने बताउनु भयो । कोइरालाले सरकारमा को को पठाउने भन्नेबारे पार्टीमा छलफल चलिरहेको बताउँदै साँझसम्म त्यो निष्कर्षमा पुग्ने जानकारी दिनुभयो ।
त्यस्तै शनिबार विहान नै प्रधानमन्त्री डा. भट्टराई र नेकपा (एमाले) का अध्यक्ष झलनाथ खनालबीच टेलिफोन वार्ता भएको छ । टेलिफोनमा कुराकानी गर्दै प्रधानमन्त्रीले शनिबार नै सरकारलाई पूर्णता दिएर संविधानको कामलाई समयमै जारी गर्नका लागि तिव्रतापूर्वक अगाडि बढाउनु पर्ने बताउनुभयो । सरकार बिस्तारमा ढिलाई भएमा संविधान निर्माण प्रक्रियामा पनि ढिलाई हुने बताउँदै प्रधानमन्त्रीले शनिबार नै सरकारमा प्रतिनिधित्व गर्ने मन्त्रीहरुको नाम पठाउन अध्यक्ष खनाललाई आग्रह गर्नुभयो ।पाँच बुँदे सहमति अनुसार सरकालाई शनिबार नै पूर्णता दिई बेलुकी ५ बजे सपथ ग्रहण गर्ने कार्यक्रम रहेको छ ।
