टोकियो- यतिबेला जापानको पार्क, उद्यान, बगैचा, नदि तथा सडकको किनारतिर जापानको राष्ट्रिय फूल साकुरा ढकमक्क फुलेर सबैको ध्यान आकर्षित गरिरहेको छ । साकुरा फुल्दाको मौसममा जापान नवदुलहीझैं सिंगारिन पुग्छ र प्रकृतिमा रमाउन मन पराउने यहाँका मानिसहरु साकुराको बोटमुनि झुम्मिन पुग्छन् अनि आपसमा सुखदुख साटासाट गर्दै खानपानसहित रमाईलो गरी पुष्पावलोकन पर्व मनाउँछन् जसलाई जापानी भाषामा हानामी भनिन्छ ।
‘हाना’ भनेको फूल र ‘मी’ भनेको हेर्नु हो, अर्थात फूल हेर्ने उत्सवकोरुपमा यो साकुरा फुल्ने मौसमले धेरैको मन त्यसैत्यसै लोभाईदिन्छ र सबैकुरा बिर्साईदिन्छ । त्यसैले त देश बिदेशका मान्छेहरु ढकमक्क फुलेको साकुराको फूल हेर्न लालायित हुने गर्दछन ।
यसैअवसरमा जापानमा रहेका नेपालीहरु पनि आफुलाई पायक पर्ने साकुराका उद्यानहरु भएको ठाउँमा भेला भई आफ्नै शैलीमा रमाईलो गर्ने र आपसमा सुखदुख साट्ने गर्दछन ।
सोही अनुसार यही आइतवार र सोमबार उएनो पार्कमा नेपालीहरुको बाक्लो उपस्थिति देखिन्थ्यो । यस बर्ष चिसोको मौसम लम्बिदा ढिलो गरी साकुरा फुलेकोले यो हप्ता मात्र हानामीका लागि उपयुक्त समय भएको बताईन्छ। यस वर्ष लगायत अघिल्ला बर्षहरुमा भएका हानामीको अवसरमा लिईएका तस्वीरहरु : समुद्रपारिको फोटो फाईलबाट