काँकडभिट्टा- झापाका पत्रकार यादव पौडेल हत्याका मुख्य आरोपी चाहना युवा परिवारका सदस्य मदन राई पक्राउ परेका छन् ।प्रहरीले पौडेल हत्या आरोपमा पक्राउ परेकाहरुको बयानका आधारमा राईलाई मुख्य अभियुक्त भनी खोजी गरिरहेको थियो । उनकै योजनामा यादवको हत्या भएको प्रहरी अनुमान छ ।
पत्रकार पौडेलको मंगलबार राति विर्तामोडमा विभत्स हत्या भएको थियो ।
यसैबीच पत्रकार यादव पौडेलको हत्याको बिरोधमा नेपाल पत्रकार महासंघले विर्तामोडमा बिहीबार प्रदर्शन गरेको छ । हत्यारालाई कारवाही, पीडित परिवारलाई न्याय र राहतको माग गर्दै प्रदर्शन गरिएको हो ।
महासंघका अध्यक्ष शिव गाउँलेको अगुवाईमा मुक्ति चोकबाट निस्केको जुलुस महासंघको कार्यालयमा आएर सभामा परिणत भएको थियो । जुलुसमा नागरिक समाज, पेशाकर्मी, अधिकारर्मी,पत्रकार लगायतको उल्लेख्य सहभागिता रहेको थियो ।
सभामा बोल्दै अध्यक्ष गाउँलले पौडेलका हत्याले लोकतन्त्र, मानवअधिकार, प्रेस स्वतन्त्रतामाथिको सिंगो आक्रमण भएको बताए । उनले घट्ना भएको ३० घण्टा बितिसक्दा पनि प्रहरीले प्रारम्भिक अनुसन्धान रिपोर्ट पनि सार्वजनिक नगरेकोमा आपत्ति जनाए । तत्काल छानविन रिपोर्ट बाहिर ल्याउन उनले माग गरे ।
सभामा महासंघका सल्लाहकार पोषण केसी, पूर्वाञ्चल संयोजक मोहनकाजी, नेपाल प्रेस युनियनका अध्यक्ष किरण पोखरेल लगायत स्थायनी राजनीतिक दल तथा विभिन्न क्षेत्रका प्रतिनिधीहरुले पत्रकार हत्याको बिरोध गर्दै दोषीलाई कारवाहीको माग गरे ।
