विराटनगर- कांग्रेस केन्द्रीय सदस्य सुजाता कोइरालाले पूर्व राजा ज्ञानेन्द्र र उनका छोरा पारस शाह ‘अपराधिक क्रियाकलाप’मा संग्लन रहेको आरोप लगाएकी छन् । पारससँग ज्वाइँ रुबेल चौधरीको झगडा भएको सम्झँदै उनले पूर्व राजपरिवार सदस्यलाई दिँइदै आएको सुरक्षा फिर्ता गर्नुपर्ने माग गरिन् ।काठमाडौंको बबरमहलमा भएको बम बिष्फोटनको घटनामा पूर्व राजाबादी सहयोग रहेकोमा आफूलाई कुनै आश्चर्य नलागेको उनको भनाइ थियो । ‘मेरो ज्वाँई(रुवेल चौधरी)को कञ्चटमा बन्दुक तेर्साउनेहरुले बबरमहलमा बम पड्काए सुन्दा मलाई आश्चर्य लागेको छैन’-विराटनगर विमानस्थलमा सोमवार सञ्चारकर्मीहरुसँग कांग्रेस नेतृले भनिन्-‘प्रजातन्त्र समाप्त पार्न पूर्व राजावादीहरु सक्रिय छन् ।’
उनले बबरमहल बम बिष्फोटनको घटनामा पूर्व राजाबादीको संलग्नता भए छानविन गरी कारवाही गर्नुपर्ने बताइन् । ‘पूर्व राजा ज्ञानेन्द्र वा पारस जसको हात रहे पनि कार्वाही हुनुपर्छ’-उनले भनिन,‘नत्र प्रजातन्त्र समाप्त हुन्छ, हामी चुप लागेर बस्नु हुँदैन ।’
सुजाताले पूर्व राजावादीहरुको अपराधिक गतिविधि र अभिव्यक्तिका विरोधमा कांग्रेसका अन्य नेताहरुलाई बोल्न समेत आग्रह गरिन । ‘कांग्रेसका नेताहरु हुन भने बोल्नुपर्छ’-उनले भनिन,‘पूर्व राजाको गतिविधिका बारेमा बोलेर जनताको नेता बन्नुपर्छ ।’
उनले आफ्ना ज्वाइँ रुवेललाई पारसले बन्दुक तेर्साएको होटल टाइगर टप्स समेत बन्द गर्न वन मन्त्रालयसँग माग गरिन । ‘त्यो होटल होइन, अपराधको अखाडा हो’-सुजाताले भनिन,‘त्यहाँ हत्या र तस्करी मात्र हुन्छ ।’ सुजाताले पूर्व राजा ज्ञानेन्द्र र पारस शाहको दैनिकी सरकारले निगरानी गर्नुपर्ने सुझाव दिइन ।
‘त्यो को हो (हु इज ही)? ज्ञानेन्द्र र पारसले मेरा ज्वाँईमाथि खुलेआम आक्रमण गरेका हुन्’-सुजाताले भनिन्,‘प्रधानमन्त्रीले कार्वाही गर्नुपर्छ बोलेर हुँदैन, एक्सनमा जानुपर्छ ।’
