काठमाडौं – नेपाल आयल निगमले अर्को साताबाट सबै निजी पम्पबाट इन्धन वितरणको तयारी गरेको छ । डिपोमा इन्धन भण्डारण गर्ने ठाउको अभाव भन्दै समाचार आएपछि निगमको सवत्र विरोध भएको थियो । त्यसपछि निगमले निश्चित पेट्रोलपम्पबाट इन्धन वितरण गरेको थियो ।
सरकारले आयातमा सुधार र तीन डिपोको इन्धन उपत्यका भित्र्याउन निर्देशन दिएलगत्तै निजी पम्पबाट पनि वितरण गर्ने तयारी गरेको हो । केही दिनअघि निगमले विराटनगर, नेपालगन्ज र भैरहवा डिपोलाई इन्धन उपत्यका पठाउन निर्देशन दिएको थियो । ती डिपोहरूबाट इन्धन भित्रिने क्रम बढेकाले सबै पम्पबाट इन्धन वितरण गर्न सकिने निगमले जनाएको हो ।
‘जिल्लाका तीन डिपोबाट इन्धन आउने क्रममा छ,’ निगमका निर्देशक मुुकुन्दप्रसाद घिमिरेले भने, ‘अर्को साताबाट सबै निजीपम्पबाट इन्धन वितरण गर्ने तयारी गर्दै छौं ।’ सबै पम्पलाई दैनिक इन्धन वितरण गरिएपनि कोटा निर्धारण गरी अथवा जोर बिजोरबाट वितरण गरिने निगमले जनाएको छ । निगमका अनुसार जिल्लाबाट दैनिक ३ सय किलोलिटर पेट्रोल र ४ सय किलोलिटर डिजेल वितरण गरिने छ ।
आपूर्ति सहज गर्न भारतीय आयल कर्पोरेसन्स आईओसी लाई अनुरोध गरिरहेको पनि निगमले जनाएको छ ।
पेट्रोलियम बिक्रेताहरूले पनि इन्धन वितरण प्रभावकारी र न्यायोचित बनाउन निजी पम्पबाट पनि इन्धन वितरण गर्न सरकारसँग माग गर्दै आएका छन् । आपूर्ति मन्त्रालय र निगमको तोक आदेशको भरमा थानकोट डिपो र उपत्यका बाहिरको जिल्लाबाट वितरण गर्दा कालोबजारी भएको ठहर गर्दै तत्काल सबै पम्पबाट वितरण गर्न माग गर्दै आएका हुन् । व्यवसायीको जायज मागलाई सरकारले सम्बोधन नगरे कडा आन्दोलनको कार्यक्रम सार्वजनिक गर्ने पेट्रोलियम डिलर्स राष्ट्रिय एसोसिएसनले जनाएको छ । ***
