टोकियो – हालसालै मात्र जापानबाट नेपाल फर्केकी गायिका सुनिता परियारको तीजे भाकाको नयाँ म्युजिक भिडियो बजारमा आएको छ ।
एक साँगीतिक कार्यक्रमका लागि केहि महिना अगाडिसम्म जापानमै रहेकी सुरिलो स्वरकी धनी सुनिता र पशुपति शर्माको स्वरबद्ध म्युजिक भिडियो ‘के मिलेन के’ बजारमा आएको हो ।
गायक पशुपति शर्माको शब्द र लय रहेको सो म्युजिक भिडियो सरगम संगीत प्रा. लि. ले बजारमा ल्याएको हो ।
उक्त म्युजिक भिडियोमा स्वयम गायिका परियार र गायक शर्माले अभिनय गरेका छन् भने प्रकाश भट्टको निर्देशन रहेको छ ।
तीजको दोहोरीमा एक अर्काले ठिकै लागेर बिहे गरेको तर अहिले ‘के मिलेन के’ भन्दै बिहेपछिको पश्चातापको भाव बोकेको छ गीतले ।
तीज नजिकिंदै गर्दा तीजको गीतमार्फत आफु कसरी बजारमा हिट हुने भन्ने ध्याउन्नमा गायक गायिकाहरुको यतिबेला छुट्टै चटारो छ । एउटा स्तरिय म्युजिक भिडियो निर्माण गर्न कम्तीमा दुई अढाई लाख खर्च लाग्ने बताईन्छ ।
सबै युट्युबमा हेर्न मिल्ने भएपछि सिडी बिक्न छोडे, तै पनि कलाकारितालाई बचाईराख्न, बजारमा टिक्न र बिक्न पनि म्युजिक भिडियो निकाल्नैपर्ने बाध्यता रहेको गायिका परियारले समुद्रपारिलाई बताईन् । उनले भनिन् – ‘हामीलाई राम्रोसंग थाहा छ, यसबाट रिटर्ब हुदैन तथापि आफ्नो परिचय स्थापित गर्न विज्ञापनकारुपमा भए पनि म्युजिक भिडियोमा लगानी गर्नुपरेको छ ।’
सुनिताका ‘बारुले कम्मर’, ‘तिमीसंग जुनी काट्ने’, ‘मैले अतित सम्झे भने’, ‘म त तिम्रै’ लगायतका आधुनिक, दोहोरी तथा तीजेभाकाका म्युजिक भिडियोहरु बजारमा आईसकेका छन् । सुनिताको स्वर आधुनिक गीतमा अझ बढी जम्ने उनलाई नजिकबाट चिनेजानेकाहरु बताउँछन् । ***
