म्याग्दी– डिभिजन सडक कार्यालय बागलुङले म्याग्दीको बैसरीमा काफलडाँडाको पहाडबाट खसेको पहिरोले पुरिएर अबरुद्ध बनेको बेनी–जोमसोम सडक खुलाउने तयारी गरेको छ ।
म्याग्दीको उत्तरी क्षेत्र हुँदै मुस्ताङ जोड्ने बेनी–जोमसोम सडकअन्तर्गत बैसरी खण्डमा जेठ १० गते मध्यराति खसेको पहिरोले एक किलोमिटर सडक पूर्णरुपमा क्षति गरेपछि सिधा सवारी आवागमन बन्द भएको छ । बैसरी नजिकैको जुगेपानीदेखि बेगखोलासम्म सवारीसाधन चलेका छैनन् । मोटरसाइकल, जिप र ट्याक्टरले गलेश्वर, पिप्ले भगवती बेगखोलाको वैकल्पिक सडक प्रयोग गरे पनि बस, ट्रकलगायत सवारीसाधन सञ्चालन हुन सकेका छैनन् ।
भत्किएको ठाउँमा मर्मत र पहिरो पन्छाउने कामका लागि लोडर, डोजरलगायत उपकरणसहित आवश्यक जनशक्ति कार्यक्षेत्रमा पठाइसकेको डिभिजन सडक कार्यालय बागलुङका प्रमुख इन्जिनियर राजेश पौडेलले जानकारी दिनुभयो । निर्माण व्यवसायी र पोखराबाट थप उपकरण मगाइएको छ । बेनीतर्फबाट मर्मत र पहिरो पन्छाउने काम सुरु गरिने उहाँले बताउनुभयो । कालीगण्डकी थुनिएर बनेको तलाउले डुबाएको सडक मर्मत गर्न तलाउको पानी घटाउनुपर्ने देखिएको छ ।
करिब ७०० मिटर लम्बाइमा फलिएको तलाउ अझै २५–३० मिटर गहिरो रहेको अनुमान गरिएको छ । सेनाको टोली सुरक्षित रुपमा पानीको निकास गराउन तयारी अवस्थामा रहे पनि पहिरो खस्ने क्रम नरोकिएकाले काम गर्न सकेको छैन । भूर्गविद्हरुको टोलीले थप पहिरोको जोखिमको विषयमा अध्ययन गरेपछि दिने सुझावको आधारमा पानीको निकास गराउने काम सुरु गर्ने सेनाको तयारी छ ।
