भैरहवा– केही समयदेखि नेपालको तराईमा सशस्त्र संघर्ष गर्दै आएका तराई मधेशी टाइगर्स समूहका नेताले ठूलो परिमाणको हतियारसहित सोमबार भैरहवामा आत्मसमर्पण गरेका छन् ।
राजनीतिक सम्वाद समितिसँगको वार्ताबमोजिम भएको ४ बुँदे सम्झौता अनुसार समूहका नेताहरुले पत्रकार, प्रहरी प्रशासन र वार्ता टोलीका सदस्यको रोहबरमा हतियार बुझाएर अब शान्तिपूर्णढंगले मुलधारको राजनीति गर्ने प्रतिवद्धता जनाएका छन् ।
टाईगर्सले टिफिन बम ४१ थान, डब्बा बम ४० थान, मोवाइल बम २, कुकर बम २, पेस्तोल १० र सोको गोली १५, सकेट बम १६, र सिक्सर १ थान बुझाएको छ । यसपूर्व पहिलो चरणमा पुस २० गते २८ थान हतियार बुझाएको पार्टीका वार्ता समिति संयोजक जयप्रकाश यादवले बताए ।
प्रहरीको मोस्ट वान्टेडको सूचीमा परेका टाईगर्स समूहका २४ जनाबढी कार्यकर्ताहरु हतियार बुझाउन जिल्ला प्रहरी कार्यालयमा आएका थिए । टाईगर्स समूहले प्रमुख जिल्ला अधिकारी तोयम रायमाझी, लुम्विनी अञ्चल प्रहरी प्रमुख प्रहरी उपरीक्षक राजेन्द्र ढकाल, सरकारकोतर्फबाट वार्ता समिति सदस्य एवम् सभासद सर्वेन्द्रनाथ शुक्लाको रोहोवरमा समूहले उक्त हतियार बुझाएको हो ।
हतियार बुझाएर शान्तिपूर्ण राजनीतिको मुलधारमा आउने प्रतिवद्धता गरेकाले मुद्धा फिर्ता गरि थुनामा रहेकाहरु छुटाउन पहल गरिने सदस्य एवं सभासद शुक्लाले आश्वासन दिए । मधेश समुदायको वृहतर हितका लागि लडाई गर्ने क्रममा समूहका ११ जनाको ज्यान गएर सहिद बनेको र २७ जना गिरफतारमा परेको पार्टीका वार्ता समिती संयोजक जयप्रकाश यादवले बताए ।
नेपाल सरकार सम्वाद समिति र समूहबीच गत मंसिर २६ गते भएको वार्ताको ४ वुदे संझौताअनुसार पहिलो चरणमा पुस २० गते २८ थान हतियार बुझाएको थियो ।