काठमाडौं – नेपालमा गणतन्त्रवादी दलहरू र राजावादी शक्तिहरूबीचको राजनीतिक ध्रुवीकरण थप चर्किंदै गएको छ । दुवै पक्ष एकअर्काविरुद्ध आक्रामक बन्दै गएका छन् । हालैका घटनाक्रमले यो टकराव झन् बढ्दै जाने सङ्केत गरेको छ ।
गत फागुन ७ गते प्रजातन्त्र दिवसका अवसरमा पोखराबाट भिडिओ सन्देश दिएका तथा फागुन २५ गते काठमाडौंमा स्वागत र्यालीमा सहभागी भएका पूर्वराजा ज्ञानेन्द्र शाहलाई गणतन्त्रवादी दलहरूले कठोर रूपमा आलोचना गरिरहेका छन् । नेपाली कांग्रेस, माओवादी केन्द्र, नेकपा एमाले र नेकपा एकीकृत समाजवादीका नेताहरूले ज्ञानेन्द्रविरुद्ध आक्रोश पोखिरहेका छन् ।
नेकपा माओवादी केन्द्रका अध्यक्ष तथा पूर्वप्रधानमन्त्री पुष्पकमल दाहाल ‘प्रचण्ड’ले सिन्धुपाल्चोकमा आयोजित पार्टी कार्यक्रममा पूर्वराजा ज्ञानेन्द्रलाई तीव्र आलोचना गर्दै दरबार हत्याकाण्डदेखि सुन तस्करीसम्मका आरोप लगाए । उनले २०६५ सालमा पहिलो पटक प्रधानमन्त्री रहँदा दरबार हत्याकाण्डको छानबिन गर्ने इच्छा व्यक्त गरे पनि सरकार टिक्न नसकेका कारण त्यो सम्भव नभएको बताए ।
पूर्वराजा ज्ञानेन्द्रमाथि इतिहासकै कठघरामा उभ्याउनुपर्ने धारणा राख्दै प्रचण्डले भने, ‘नेपाली जनताले मूर्ति चोर, भाइमारा, सुन तस्कर को हो भन्ने भुल्नुहुँदैन ।’ उनका अनुसार, २०५८ सालको दरबार हत्याकाण्डको मास्टरमाइण्ड पूर्वराजा ज्ञानेन्द्र नै थिए ।
प्रचण्डको भनाइपछि राजावादी शक्तिहरू पनि उत्तिकै आक्रोशित बनेका छन् । राष्ट्रिय प्रजातन्त्र पार्टी (राप्रपा) संसदीय दलका प्रमुख सचेतक ज्ञानेन्द्र शाहीले प्रचण्डलाई प्रतिवाद गर्दै दरबार हत्याकाण्डको सबैभन्दा ठूलो फाइदा उनले नै उठाएको आरोप लगाए । शाहीले सामाजिक सञ्जालमार्फत प्रचण्डलाई विदेशी शक्तिको इसारामा राजा वीरेन्द्रको वंश नाश गरेको दोष लगाए । साथै, उनले माओवादी युद्धकालका घटनाहरूको पुनः चर्चा गर्दै प्रचण्डमाथि नेपाली जनताको हत्या गरेको आरोप लगाए ।
हेटौँडामा प्रचण्डको फोटो जलाइएको छ । शनिबार हेटौँडामा भइरहेको प्रजातान्त्रिक राष्ट्रिय युवा संगठनको अधिवेशनको उद्घाटन सत्रमा राष्ट्रिय प्रजातान्त्रिक युवा संगठनका केन्द्रीय सचिव नीराजन बम पतालाले रोष्ट्रममै प्रचण्डको फोटो जलाएका हुन् ।
राजसंस्था पक्षधरहरूले शनिबार नारायणहिटी दरबारअगाडि प्रदर्शन गरेका छन् । सामाखुसीबाट मोटरसाइकल र्यालीसहित उनीहरू नारायणहिटी दरबारअगाडि पुगेका थिए । प्रदर्शनकारीहरूले राजा छिट्टै फर्किने दाबी गर्दै नारायणहिटी खाली गर्नसमेत चेतावनी दिएका छन् ।
