समाचार सुन्नुहोस :
काठमाडौँ – समाजवादी मोर्चाले सरकारको निष्क्रियता र अलोकतान्त्रिक व्यवहारका कारण संघीय लोकतान्त्रिक गणतन्त्रमा खतरा रहेको बताएको छ। मोर्चाले प्रतिगामी तत्वहरूको षड्यन्त्रलाई असफल पार्न जनतालाई एकजुट हुन आह्वान गरेको छ। नेकपा माओवादी केन्द्र, एकीकृत समाजवादी र नेकपा लगायतका दलहरू समावेश समाजवादी मोर्चाले सरकारको गलत नीतिहरूका कारण राजतन्त्र फर्काउने प्रयास बढेको आरोप लगाएका छन्। मोर्चाले चैत १५ मा काठमाडौंमा ठूलो विरोध प्रदर्शन र जनसभा आयोजना गर्ने घोषणा गरेको छ।
मोर्चाका नेताहरूले सरकारको अलोकतान्त्रिक रवैया र कार्यशैलीले नेपाली जनताको अधिकारहरू कुण्ठित हुँदै गएको पनि बताएका छन्। सरकारको स्वेच्छाचारिता, भ्रष्टाचार, कमिशन र कालोबजारीले देशलाई गम्भीर आर्थिक संकटमा धकेलेको छ। सरकारले दलाल र स्वार्थी तत्वहरूको हितमा काम गर्दै जनतामा निराशा फैलाएको र यसले राजतन्त्र फर्काउने प्रयासहरूलाई बल मिलेको मोर्चाले जनाएको छ।
साथै मोर्चाले सरकारलाई लोकतान्त्रिक मूल्यको उपहास गर्ने आरोप लगाएको छ। सरकारले अध्यादेश मार्फत शासन चलाउने, संसदलाई बेवास्ता गर्ने र महत्वपूर्ण विधेयकहरूलाई अवरुद्ध गर्ने गरेको आरोप लगाइएको छ। यसले नेपाली जनतामा असन्तुष्टि र आक्रोश बढाएको छ। मोर्चाले यसले संघीय लोकतान्त्रिक गणतन्त्रको रक्षा, राष्ट्रिय स्वाधीनता र समाजवादी यात्रामा गम्भीर चुनौती उत्पन्न भएको बताएको छ।
