काठमाडौं – राष्ट्रिय प्रजातन्त्र पार्टी (राप्रपा) का वरिष्ठ उपाध्यक्ष रवीन्द्र मिश्रले राजसंस्थालाई निरन्तर निषेध गरिए देश गलत दिशातर्फ जान सक्ने चेतावनी दिएका छन् ।
शनिबार बिहान सामाजिक सञ्जाल फेसबुकमा आफ्नो धारणा व्यक्त गर्दै मिश्रले ठूला राजनीतिक दलका नेताहरूले राजसंस्थाप्रति प्रयोग गरिरहेका तुच्छ शब्दहरूको आलोचना गरे । उनले पूर्वप्रधानमन्त्री एवं माओवादी केन्द्रका अध्यक्ष पुष्पकमल दाहाल ‘प्रचण्ड’ले हालै पूर्वराजा ज्ञानेन्द्र शाहलाई अपमानजनक शब्द प्रयोग गरेको उल्लेख गर्दै यस्तो प्रवृत्तिले मुलुकलाई नसोचेको बाटोतर्फ धकेल्न सक्ने बताए ।
उनका अनुसार नेपालको परिप्रेक्ष्यमा लोकतन्त्रको सुदृढीकरणको विकल्प उन्नत लोकतन्त्र नभई ‘उन्नत प्रजातन्त्र’ हो । मिश्रले पछिल्लो राजनीतिक घटनाक्रमले राजसंस्था र यसको सम्भावित भूमिकाबारे पुनर्विचार गर्नुपर्ने संकेत दिएको पनि बताएका छन् ।
