समाचार सुन्नुहोस :
काठमाडौँ – काठमाडौं महानगरपालिकाका मेयर बालेन्द्र शाह (बालेन)ले सामाजिक सञ्जाल विधेयकप्रति संकेतपूर्ण असहमति जनाउँदै आफ्नो पुरानो गीतको भिडिओ फेसबुकमा शेयर गरेका छन्।
बालेनले काठमाडौं महानगरको मेयर पदमा उम्मेदवारी दिँदा सुरजसिंह ठकुरीको ‘इट्स माइ शो’ कार्यक्रममा बलिदान फिल्मको गीत प्रस्तुत गरेका थिए। उक्त कार्यक्रममा ललितपुर महानगरपालिकाका मेयर चिरीबाबु महर्जन पनि सहभागी थिए। बालेनको सो गीत चुनावी अभियानमा प्रभावकारी सावित भएको चर्चा चल्दै आएको छ।
हालै संसदमा दर्ता भएको सामाजिक सञ्जाल विधेयकमा अभिव्यक्ति स्वतन्त्रताको हनन गर्ने तथा सरकारको आलोचनालाई दबाउनेगरी प्रावधान राखिएको भन्दै आलोचना भइरहेको छ । यही सन्दर्भमा बालेनले आफ्नो पुरानो भिडिओ शेयर गर्दै विधेयकप्रति असहमति जनाएको अनुमान गरिएको छ । आफ्ना अधिकांश पोस्टमा क्याप्सन लेख्ने बालेनले यसपटक कुनै टिप्पणी नगरी भिडिओ मात्रै शेयर गरेका छन् ।
यस्तो छ बालेनले शेयर गरेको गीतको अंशः
‘मलाई बोल्न दे, सरकार, अपराध हैन
मन खोल्न दे, दरबारको म सराप हैन
मन खराब छैन, सही बोल्न डरउँदैन
कानुन पो लाग्छ कि? आवाज उठाउदैमा…’