काठमाडौं – अमेरिकी राष्ट्रपति डोनाल्ड ट्रम्पको प्रशासनले अवैध आप्रवासीहरू विरुद्धको कारबाहीलाई तीव्र बनाउँदै निर्वासन प्रक्रिया अघि बढाएको छ । सोमबार, अमेरिकी वायुसेनाको सी-१७ विमान अवैध आप्रवासीहरू लिएर भारततर्फ प्रस्थान गरेको छ ।
समाचार एजेन्सी रोयटर्सका अनुसार सो विमानलाई भारत पुग्न करिब २४ घण्टा लाग्ने अनुमान गरिएको छ । तथापि, उक्त उडानमा कति आप्रवासीहरू सवार थिए भन्ने कुरा हालसम्म स्पष्ट गरिएको छैन । रोयटर्सले विमानको उडान समयबारे पनि जानकारी खुलाएको छैन ।
राष्ट्रपति ट्रम्पले आफ्नो कार्यकालमा ठूलो मात्रामा अवैध आप्रवासीहरूको निर्वासन गर्ने प्रतिबद्धता व्यक्त गरेका थिए । यसैअनुसार, अमेरिकी अध्यागमन तथा भन्सार प्रवर्तन (आईसीई) निकायले करिब १५ लाख अवैध आप्रवासीहरूको सूची तयार गरेको थियो ।
ट्रम्पले पदभार ग्रहण गरेपछि पहिलो ११ दिनमा २५ हजारभन्दा बढी अवैध आप्रवासीहरूलाई हिरासतमा लिइएको थियो । यस अवधिमा आईसीई टोलीले १२ वटा राज्यमा छापा मारेको थियो, जसमा अधिकांश रिपब्लिकन बहुल राज्य थिए ।
यसैबीच, मेक्सिकोको सीमाबाट हुने अवैध प्रवेशमा उल्लेखनीय गिरावट आएको देखिएको छ । जनवरी १ देखि १९ सम्म दैनिक औसत २ हजार ८७ घुसपैठका घटनाहरू दर्ता भएका थिए । तर ट्रम्पले सत्ता सम्हालेपछि, जनवरी २० देखि ३१ सम्म यो संख्या घटेर १२६ मा सीमित भएको छ ।