समाचार सुन्नुहोस :
काठमाडौँ – नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले प्रधानमन्त्री केपी शर्मा ओलीको नेतृत्वलाई देशका लागि दुर्भाग्यपूर्ण भएको बताएका छन्। म्याग्दीको बेनीमा आयोजित पार्टीको खबरदारी सभामा सम्बोधन गर्दै प्रचण्डले ओलीलाई फटाहाको संज्ञा दिएका छन्। उनले ओली प्रधानमन्त्री रहेसम्म देशले समृद्धि र स्थायित्व नपाउने दाबीसमेत गरे।
“यो गठबन्धन बनाउने बेलामा एमालेको नेता, जो अहिले प्रधानमन्त्री हुनुहुन्छ । उहाँले यति धेरै ढाँटछल, जालझेल गर्नुभयो । मलाई त गर्नसम्म गर्नुभयो,” प्रचण्डले भने, “तपाईंहरुले सुन्नुभएकै छ स्वर्ग र नर्कको कुरा । उहाँ हस्ताक्षर गरेर आएर गरेकै छैन भन्ने, यस्तो जालीझेली, यस्तो फटाहा मान्छे प्रधानमन्त्री भएपछि देशले सुख पाउँछ त ? देशको लागि यो भन्दा ठूलो दुर्भाग्य के होला ।”
साथै, आफूले प्रतिनिधि सभामा विश्वासको मत नपाएपछि ठूलो दलको हैसियतले नेपाली काङग्रेसका सभापति शेरबहादुर देउवा प्रधानमन्त्री बन्नुपर्नेमा संविधान मिचेर ओलीलाई बनाइएकोसमेत बताए ।