साउदीमा सडक दुर्घटनामा परी ३ नेपालीको मृत्यु

समाचार सुन्नुहोस : 

काठमाडौँ – साउदी अरबको जिजान नजिक भएको सडक दुर्घटनामा तीन नेपाली कामदारको मृत्यु भएको छ। जेद्दास्थित नेपाली महावाणिज्य दूतावासका अनुसार मृत्यु हुनेमा कृष्ण खत्री, रूपक कार्की र मानबहादुर राना छन्। सोही दुर्घटनामा एक नेपाली घाइते भएका छन्। उनको अस्पतालमा उपचार भइरहेको छ। मृतकका परिवारलाई जानकारी गराइसकिएको र उनीहरूको शव स्वदेश पठाउने प्रक्रिया भइरहेको दूतावासका अधिकारी सुवास यादवले बताए।

यो दुर्घटनामा नौ भारतीय नागरिक र तीन घानाका नागरिकको पनि ज्यान गएको भारतीय वाणिज्य दूतावासले जनाएको छ। साउदी प्रेस एजेन्सीका अनुसार दुर्घटनामा १५ जनाले ज्यान गुमाएका छन् भने ११ जना घाइते भएका छन्। जिजानको दक्षिणी बन्दरगाह क्षेत्र नजिकै कार्यस्थलतर्फ गइरहेको बस एक ट्रेलरसँग ठोक्किँदा दुर्घटना भएको हो।