समाचार सुन्नुहोस :
काठमाडौँ – नेकपा (माओवादी केन्द्र)का राष्ट्रियसभा सदस्य नारायणकाजी श्रेष्ठले सरकारलाई विधेयक अधिवेशनलाई ‘अध्यादेश अधिवेशन’मा परिणत गरेको आरोप लगाएका छन्। शुक्रबार राष्ट्रियसभाको बैठकमा बोल्दै श्रेष्ठले सरकारले नियमित अधिवेशन समयमा नबोलाउने र अध्यादेशहरू धमाधम जारी गर्ने प्रवृत्ति अपनाएको भन्दै आपत्ति जनाए।
“सरकारले यो अधिवेशनलाई अध्यादेश अधिवेशन बनाएको छ। हिउँदे अधिवेशन नियमित समयमा नगरी ढिलो गराउने र त्यसको सट्टा अध्यादेशहरू लगातार जारी गर्ने प्रवृत्ति गलत छ। सरकारले विधेयक अधिवेशनको सट्टा अध्यादेशको अधिवेशन बनाउन खोजेको देखिन्छ। म यसको विरोध गर्दछु। सरकारको अध्यादेशमार्फत शासन गर्ने प्रवृत्तिप्रति गम्भीर आपत्ति जनाउन चाहन्छु,” उनले भने।
श्रेष्ठले सत्तापक्ष र प्रतिपक्ष दुवैले मिलेर देश विकासका लागि एकताबद्ध भएर काम गर्नुपर्ने धारणा व्यक्त गरे।
