काठमाडौँमा पनि कार्यान्वयनमा आयो नागरिकताको अनलाइन सिफारिस सेवा

समाचार सुन्नुहोस : 

काठमाडौँ – काठमाडौं उपत्यकाभित्र पहिलो पटक चन्द्रागिरि नगरपालिकाले नागरिकताको अनलाइन सिफारिस सेवा सुरु गरेको छ। यो सेवा वडा नं १२ बलम्बुबाट औपचारिक रूपमा सुरुआत भएको हो।

सेवा सञ्चालनका लागि गृह मन्त्रालय र जिल्ला प्रशासन कार्यालय काठमाडौंको समन्वयमा नगरपालिकाले १५ वटै वडाका सचिव तथा कार्यपालिका सदस्यलाई आवश्यक तालिम दिएको थियो।

सोमबार नगरप्रमुख घनश्याम गिरी र प्रमुख प्रशासकीय अधिकृत हेमराज अर्यालले चन्द्रागिरि-१२ बलम्बुका अनुज महर्जन र टिसा श्रेष्ठलाई अनलाइन सिफारिस हस्तान्तरण गरी सेवाको थालनी गरे। गृह मन्त्रालयका अनुसार हालसम्म देशभरका २८ जिल्लाका दुई हजार वडामा यो सेवा सुरु भइसकेको छ। यो सेवा २०८० सालमा नवलपरासीको गैँडाकोटबाट सुरु गरिएको थियो।