त्रिपाठी कुटिएको विरोधमा कानून व्यवसायीको कालोपट्टी बाँधेर प्रदर्शन

समाचार सुन्नुहोस : 

काठमाडौँ – वरिष्ठ अधिवक्ता दिनेश त्रिपाठीमाथि भएको कुटपिट घटनाको विरोधमा नेपाल बार एसोसिएसनका कानून व्यवसायीहरूले कालोपट्टी बाँधेर प्रदर्शन गरेका छन्।

आइतबार दिउँसो एसोसिएसन परिसरमा भएको प्रदर्शनमा कानून व्यवसायीहरूले न्याय सुनिश्चित गर्न दोषीमाथि कठोर कारबाहीको माग गरे। माघ २ गते काठमाडौं जिल्ला अदालत परिसरभित्र अधिवक्ता त्रिपाठीमाथि कुटपिट भएको थियो। उक्त घटनापछि त्रिपाठीले प्रहरी वृत्त सिंहदरबारमा जाहेरी दर्ता गरेका छन्।

पक्राउ परेका ललितकुमार केसीलाई घटनामा संलग्न रहेको आरोपमा प्रहरीले हिरासतमा राखेर अनुसन्धान गरिरहेको छ। नेपाल बार एसोसिएसन, सर्वोच्च अदालत बार र काठमाडौं जिल्ला अदालत बारले दोषीलाई शीघ्र कानुनी दायरामा ल्याई कडा कारबाही गर्न आग्रह गरेका छन्।