समाचार सुन्नुहोस :
काठमाडौँ – चालु आर्थिक वर्ष २०८१/८२ को अर्धवार्षिक समीक्षासम्म सरकारले तिर्न बाँकी कुल ऋण २५ खर्ब ३६ अर्ब १३ करोड पुगेको छ। सार्वजनिक ऋण व्यवस्थापन कार्यालयद्वारा सार्वजनिक प्रतिवेदनअनुसार, चालु आर्थिक वर्षको सुरुदेखि हालसम्म सरकारी ऋण एक खर्ब दुई अर्बले बढेको हो।
प्रतिवेदनमा उल्लेख भएअनुसार, चालु आर्थिक वर्षको सुरुआतमा सरकारी ऋण २४ खर्ब ३४ अर्ब थियो। जुन पुस मसान्तसम्म बढेर २५ खर्ब नाघेको छ। यो कूल गार्हस्थ्य उत्पादन (जीडीपी) को ४४.४६ प्रतिशत हो। कुल ऋणमध्ये ५१.३१ प्रतिशत अर्थात् १३ खर्ब १ अर्ब वैदेशिक ऋण र ४८.६८ प्रतिशत अर्थात् १२ खर्ब ३४ अर्ब आन्तरिक ऋण रहेको छ।
सरकारले चालु आर्थिक वर्षमा पाँच खर्ब ४७ अर्ब ऋण संकलन गर्ने लक्ष्य राखेको भए पनि पुससम्म ४३.८९ प्रतिशत मात्र अर्थात् दुई खर्ब ४० अर्ब ऋण उठाइएको छ। आन्तरिक ऋण संकलनमा वार्षिक लक्ष्यको तुलनामा ५४.८६ प्रतिशत मात्र सफलता मिलेको छ भने वैदेशिक ऋणमा यो २७.२० प्रतिशत पुगेको छ।
सार्वजनिक ऋण तिर्न चालु वर्षका लागि चार खर्ब दुई अर्ब छुट्याइएकोमा हालसम्म एक खर्ब ८२ अर्ब ४० करोड साँवा ब्याज तिर्ने कार्यमा खर्च भएको छ। यो रकम वार्षिक लक्ष्यको ४५.२८ प्रतिशत र जीडीपीको ३.२० प्रतिशत हो।
