समाचार सुन्नुहोस :
काठमाडौँ – महाभियोगपछि निलम्बित भएका दक्षिण कोरियाली राष्ट्रपति युन सुक योलले अनुसन्धानका क्रममा कुनै वयान दिन अस्वीकार गरेको कुरा बुधबार अनुसन्धान अधिकारीहरूले खुलासा गरेका छन्। दक्षिण कोरियाको भ्रष्टाचार अनुसन्धान कार्यालय (सीआईओ)ले स्थानीय समयअनुसार बिहान ११ बजेदेखि दिउँसो १ः३० सम्मको सोधपुछमा युनले बयान दिन मानेनन्। साथै, सोधपुछको प्रक्रिया रेकर्ड वा भिडियो टेप गर्न समेत युनले अनुमति दिएनन्।
स्थानीय मिडियाका अनुसार युनलाई ‘सियोल डिटेन्सन सेन्टर’मा स्थानान्तरण गर्ने सम्भावनाबारे राष्ट्रपतिको सुरक्षा टोलीसँग सीआईओ छलफलमा रहेको छ। सीआईओले थप हिरासतको अवधि बढाउन ‘सियोल वेस्टर्न डिस्ट्रिक्ट कोर्ट’मा अनुमति माग्दै पक्राउ पूर्जी जारी गर्न आवेदन दिने योजना बनाएको छ। सहमति भएमा हिरासत अवधि बढीमा २० दिनसम्म लम्ब्याउन सकिनेछ।
सीआईओले १० दिनको हिरासतपछि युनलाई अभियोजन पक्षमा हस्तान्तरण गर्ने तयारी गरिरहेको छ। तर युनको कानुनी टोलीले सीआईओको अधिकारलाई चुनौति दिदै पक्राउ पूर्जी गैरकानुनी भएको दाबी गरेको छ। उनको कानुनी टोलीले सीआईओ र प्रहरीलाई यस गैरकानुनी प्रक्रियाका लागि कानुनी जवाफदेही बनाउने प्रतिबद्धता पनि जनाएको छ।
