समाचार सुन्नुहोस :
काठमाडौँ – नेपाल प्रहरीका पूर्वप्रमुख सर्वेन्द्र खनालले एमाले परित्याग गरेको घोषणा गरेका छन्। सामाजिक सञ्जाल फेसबुकमार्फत् उनले आफू कुनै पनि राजनीतिक दलसँग आबद्ध नरहेको स्पष्ट पारेका छन्। ‘हजुरहरूलाई मेरो राजनीतिक स्थितिबारे अन्योलमा परेको महसुस गरेर म यसै माध्यमबाट स्पष्ट पार्न चाहन्छु कि म अहिले कुनै पनि राजनीतिक पार्टीसँग आबद्ध छैन,’ उनले लेखेका छन्।
आफ्नो बयानमा उनले देश र समाजको हितका लागि संघर्ष जारी राख्ने प्रतिबद्धता व्यक्त गरेका छन्। खनालले थप लेखेका छन्, “राष्ट्रघाती दोषीहरूलाई कानूनी कठघरामा पुर्याउन र हाम्रो राष्ट्रलाई महान् बनाउन मेरो सम्पूर्ण प्रयास जारी रहनेछ। म देश र जनताको हितका लागि सधैँ लडिरहनेछु”। खनाल नेपाल प्रहरीका २६औं प्रहरी महानिरीक्षक हुन्। आफ्नो प्रहरी सेवापछि उनले २०७९ असोज ६ गते एमालेमा प्रवेश गरेका थिए। च्यासलस्थित पार्टी कार्यालयमा एमाले अध्यक्ष केपी शर्मा ओलीले खनाललाई स्वागत गरेका थिए।
अघिल्लो प्रतिनिधिसभा चुनावमा काठमाडौं-६ बाट रास्वपाका शिशिर खनालसँग पराजित भएका उनी तनहुँ-१ उपनिर्वाचनमा पनि रास्वपाकै स्वर्णिम वाग्लेसँग हारेका थिए। त्यसपछि उनी एमालेभित्र निष्क्रियजस्तै बनेका थिए।
