समाचार सुन्नुहोस :
काठमाडौँ – नेकपा (एकीकृत समाजवादी)का सम्मानित नेता तथा पूर्वप्रधानमन्त्री झलनाथ खनालले नेपालले आफ्नो राष्ट्रिय हितलाई ध्यानमा राख्दै चीनको बेल्ट एन्ड रोड इनिसिएटिभ (बीआरआई) अन्तर्गत परियोजना प्रस्ताव अघि बढाउनुपर्ने बताएका छन्। बुधबार काठमाडौंमा नीति अनुसन्धान संस्थाले आयोजना गरेको “नेपालमा बीआरआई परियोजनाको कार्यान्वयन सम्भावना” विषयक अन्तरक्रियामा पूर्वप्रधानमन्त्री खनालले बीआरआई नेपालको हितमा हुने धारणा व्यक्त गरेका हुन्। उनले बीआरआईले विश्वव्यापी रूपमा महत्व पाएको र आवश्यकताका आधारमा परियोजनाहरू कार्यान्वयन गर्न सकिने बताए।
उनको भनाइमा, “ऋण लिन हुँदैन भन्ने धारणा पुराना हुन्। आवश्यकतालाई प्राथमिकता दिँदै परियोजनाहरू अघि बढाउनुपर्छ।” साथै, बीआरआईका विषयमा नेपाली जनताले थप गहिरो बुझाइ बनाउन आवश्यक रहेको उनको भनाइ छ।
दुई छिमेकी राष्ट्रहरूसँग सौहार्दपूर्ण सम्बन्ध कायम राख्नुपर्नेमा जोड दिंदै खनालले बीआरआईलाई विवादको विषय बनाउन नहुने सुझाव पनि दिए। उनले विश्वको करिब ७५ प्रतिशत जनसंख्या यस परियोजनामा आबद्ध भएको र तीन हजारभन्दा बढी परियोजनाका लागि सम्झौता भइसकेको तथ्य प्रस्तुत गर्दै बीआरआईलाई विश्व विकासको लागि महत्त्वपूर्ण भनेका छन्।
