समाचार सुन्नुहोस :
काठमाडौँ – दक्षिण कोरियाले अध्यागमन कानुन उल्लंघनको आरोपमा ९ नेपाली नागरिकलाई निष्कासन गरेको छ। नेपालीहरूको लोकप्रिय गन्तव्य बन्दै गइरहेको कोरियामा कानुन विपरीत काम गर्नेहरूले समस्यामा पर्ने गरेका छन्।
स्रोतका अनुसार निष्कासन गरिएकामा कान्छालाल मोक्तान, दावा छिरिङ शेर्पा, नवदत्त गुरुङ, विशेष लामा, गोपाल राना मगर, निर्मल गौतम, रुद्रबहादुर भुजेल, सन्दीप लामा र भिसाको अवधि नाघेका कुमार तामाङसमेत रहेका छन्। ती सबैलाई थाइ एयरवेजमार्फत नेपाल फर्काइएको बताइएको छ।
इपीएस कार्यक्रमबाहेक अन्य गैरकानुनी माध्यमबाट कोरिया पुग्ने नेपालीहरूको संख्या उल्लेख्य छ। आकर्षक तलब र सजिलो प्रलोभनमा परेर कोरिया जानेहरूले भाषा परीक्षा बिनै जाने प्रयास गर्दा कानुनी समस्या झेल्नुपरेको त्यहाँ रहेका नेपालीहरूले बताएका छन्। अध्यागमन नियम उल्लंघन गर्ने क्रमले नेपाली समुदायका लागि नकारात्मक प्रभाव पारेको पनि स्पष्ट भएको छ।
