समाचार सुन्नुहोस :
काठमाडौँ – नेकपा एमालेबाट निष्कासित नेता डा. भीम रावलले प्रधानमन्त्री केपी शर्मा ओलीको नेतृत्वमा सुशासन स्थापना हुनसक्छ भनेर पत्याउनुपर्ने हो? भन्ने गम्भीर प्रश्न उठाएका छन्। बुधबार काठमाडौंमा आयोजित पत्रकार सम्मेलनमा रावलले उक्त प्रश्न सार्वजनिक रूपमा राख्दै आफ्नो धारणा व्यक्त गरेका हुन्।
‘मेरो ४९ वर्षको पार्टी सदस्यता खोस्ने र ५१ वर्षको राजनीतिक जीवन समाप्त गर्न खोज्ने, पार्टीले प्रतिक्रियावादी र देशद्रोही भनिएकाहरू भ्रष्ट, अनैतिक, विचौलिया र दलालहरूसँग साँठगाँठ गरी केपी ओलीले देशमा के सुशासन र समाजवाद ल्याउन खोजेको भनेर पत्याइदिनुपर्ने हो र ?,’ रावलको प्रश्न छ ।
एमालेबाट निष्कासित भएपछि रावलले आज पहिलोपटक पत्रकार सम्मेलन गरेका हुन् । कार्यक्रमका क्रममा उनले वर्तमान सरकारले ठूला भ्रष्टाचार काण्डमा संलग्न भनिएका व्यक्तिहरूलाई बचाउने प्रयास गरिरहेको आरोप पनि लगाएका छन्। ‘सत्तामा हालीमुहाली गर्ने भनिएकाहरू नै हस्तक्षेप गर्ने उपकरण बनेका छन्,’ रावलले भने, ‘भाडाका सिपाही, श्रमीक, सुसारे, सेवक भएर विदेशमा पसिना बगाउन थुप्रै नेपाली बाध्य भइरहेका छन् ।’
