समाचार सुन्नुहोस :
काठमाडौँ – ग्रेगोरियन पात्रोअनुसार आजदेखि नयाँ वर्ष इस्वी संवत् २०२५ सुरु भएको छ। यो संवत् जिजस क्राइस्टलाई फाँसी दिएपछि प्रारम्भ भएको मानिन्छ। पोप ग्रेगोरियनले जुलियन पात्रो प्रतिस्थापन गर्दै यो नयाँ पात्रो लागू गरेपछि यसलाई ग्रेगोरियन पात्रोअनुसारको नयाँ वर्ष भनिन्छ।
जुलियन पात्रोको सुरुवात रोमी शासक जुलियस सिजरले गरेका थिए। तर, यो पात्रोलाई वैश्विक मान्यता दिन धेरै समय लाग्यो। रसियाले त २०० वर्षपछि मात्र यो पात्रोलाई स्वीकार गरेको ज्योतिषविद् डा. खिलानाथ बस्ताकोटी बताउँछन्।
नेपालमा इस्वी संवत् प्रचलनमा नरहे पनि यहाँ भ्रमण गर्ने विदेशीहरूले यसलाई प्रयोग गर्छन्। पछिल्ला वर्षहरूमा नेपालका केही स्थानहरूमा समेत इस्वी संवत्को नयाँ वर्ष उत्सव मनाउने गरिएको छ।
विशेषगरी विदेशी पर्यटकको रोजाइका काठमाडौँको ठमेल, बौद्ध, पोखरा, सौराहा र लुम्बिनीलगायतका स्थानहरूमा ‘न्यू इयर इभ’ को धूमधामले वातावरण रमाइलो बनाउँछ। मंगलबार बेलुकी नै राजधानीका ठमेल, बौद्ध, स्वयम्भू र नयाँ सडकजस्ता क्षेत्रमा उत्साहजनक चहलपहल देखिन्थ्यो।
