समाचार सुन्नुहोस :
काठमाडौँ – गुरुङ समुदाय आज उल्लासपूर्वक ‘तमु ल्होसार’ मनाउँदैछन्। ‘तमु ल्होसार’ नाममा रहेको ‘ल्हो’ को अर्थ वर्ष र ‘सार’ को अर्थ फेरिनु भएकाले वर्ष परिवर्तन हुने दिनलाई यो पर्व भनिन्छ। यो पर्व गुरुङ समुदायले नयाँ वर्षको आगमनका रूपमा विशेष र भव्य रूपमा मनाउने प्रचलन छ।
यो पर्व सूर्यको किरणसँग प्रत्यक्ष सम्बन्धित मानिन्छ। लमजुङ, गोरखा, तनहुँ, स्याङ्जा, मनाङ, कास्की, र पर्वतजस्ता गुरुङ बाहुल्य रहेका क्षेत्रहरूमा सूर्यको ताप पहिले आउने भएकाले पुस १५ मा यो पर्व मनाइने जनविश्वास रहेको छ। यसैगरी, तामाङ र शेर्पा समुदायको क्षेत्रमा माघ र फागुन महिनामा सूर्यको ताप आउने समय यो पर्व मनाइने परम्परा छ।
पुस १५ लाई वर्षको सबैभन्दा लामो रात भएकाले पनि विशेष मानिन्छ। यो दिनपछि रातहरू छोटिँदै जाने प्राकृतिक परिवर्तनले यस पर्वको महत्त्वलाई अझ प्रस्ट पार्छ। ‘तमु ल्होसार’ को उपलक्ष्यमा सरकारले आज सार्वजनिक बिदा दिएको छ।
गुरुङ समुदायले राजधानीको टुँडिखेलमा विशेष कार्यक्रम आयोजना गर्दै यो अवसरलाई उत्सवमय बनाइरहेका छन्। यस्तै, देशका अन्य स्थानहरूमा पनि पुस १५ विशेष रूपमा मनाउने चलन छ। सुदूरपश्चिम र कर्णालीका गाउँघरमा गाउँखाने कथा सुनाउँदै रातभर जाग्राम बस्ने परम्पराले यो पर्वको मौलिकतालाई झल्काउँछ।
