समाचार सुन्नुहोस :
काठमाडौँ – २०७२ को विनाशकारी भूकम्पले ध्वस्त पारेको ऐतिहासिक धरहरा पुनःनिर्माणपछि सञ्चालन भएको एक महिना पुगेको छ। सञ्चालन अवधि भरमा धरहराबाट रु. ५५ लाख राजस्व सङ्कलन भएको छ। गत मंसिर ९ गते सर्वसाधारणका लागि शुल्कसहित खुला गरिएको यो स्थलमा दैनिक करिब १,२०० व्यक्तिले भ्रमण गर्ने गरेका छन्।
कामु आयोजना निर्देशक प्रकाश अर्यालले १२ वर्षभन्दा कम उमेरका बालबालिकाको तथ्याङ्क बाहेक, हालसम्म ३१,००० भन्दा बढी नागरिकले धरहरा चढेको जनाएका छन्। धरहरा चढ्न बिहान १०:३० देखि दिउँसो ३:०० बजेसम्म समय छुट्याइएको छ। छिमेकी मुलुक भारत लगायत विभिन्न स्थानबाट आउने पर्यटकहरूको उल्लेखनीय उपस्थिति देखिएको छ।
प्रवेश शुल्क प्रतिव्यक्ति रु. २०० निर्धारण गरिएको छ। विद्यार्थी, ज्येष्ठ नागरिक, बालबालिका र अपाङ्गता भएका व्यक्तिहरूले ५०% छुट पाउँछन्। सार्क राष्ट्रका पर्यटकले रु. ५०० र अन्य अन्तर्राष्ट्रिय पर्यटकले रु. १००० शुल्क तिर्नुपर्ने छ। धरहरा परिसरमा पार्किङ शुल्क दुई पाङ्ग्राका लागि रु. १० र चार पाङ्ग्राका लागि प्रतिघण्टा रु. २० रहेको छ। साथै, धरहरा स्तम्भमा विज्ञापन र व्यावसायिक गतिविधिका लागि छुट्टै शुल्क तोकिएको छ।
