समाचार सुन्नुहोस :
काठमाडौँ – आज हरिबोधिनी एकादशी पर्व धूमधामका साथ मनाइँदैछ। हरेक वर्ष कात्तिक शुक्ल एकादशीका दिन भगवान विष्णुको प्रतीक तुलसीको विवाह दामोदरसँग गराएर यो पर्व मनाउने प्रचलन छ।
भक्तजनहरूले आज तुलसीको पूजा गर्दै विष्णु भगवानको विशेष आराधना गर्छन्। यसलाई अत्यन्तै पुण्य प्राप्त हुने अवसरको रूपमा लिइन्छ। यस दिनलाई विष्णु भगवान् चार महिनाको योगनिद्राबाट जागृत हुने दिनका रूपमा समेत मानिन्छ ।
मन्दिरहरू र घर आँगनहरूमा आज तुलसीको मण्डप सजाएर दीप प्रज्वलन, भजन–कीर्तन र प्रसाद वितरण गर्दै श्रद्धालुहरूले धार्मिक उत्साहका साथ यो पर्व मनाइरहेका छन्। यस दिनको पूजा–आराधनाले पापबाट मुक्ति, पुण्य लाभ, रोग निवारण र घरमा यमदूतको प्रवेश नहुने विश्वास रहेको छ।
