समाचार सुन्नुहोस :
काठमाडौँ – प्रधानमन्त्री केपी शर्मा ओलीले आज प्रतिनिधिसभाको बैठकलाई सम्बोधन गर्ने भएका छन् । दिउँसो १ बजे बोलाइएको बैठकमा ओलीले आफ्नो धारणा राख्नेछन्। माओवादी केन्द्रले विगत केही दिनदेखि संसद् अवरोध गर्दै आएको भए पनि आजको बैठकमा प्रधानमन्त्रीलाई सम्बोधन गर्न दिइने भएको हो। माओवादीले ‘हिंसा’ शब्द संसद्को रेकर्डबाट हटाउन माग गर्दै अवरोध गरिरहेको थियो।
साथै, संघीय संसद्को दुवै सदनको चालु अधिवेशन आज रातिदेखि नै अन्त्य हुँदैछ। सरकारले संसद्को अधिवेशन अन्त्य गर्न राष्ट्रपति समक्ष सिफारिस गर्ने निर्णय गरिसकेको छ।मन्त्रिपरिषद्को आइतबारको बैठकले आज राति १२ बजेदेखि संसद्को अधिवेशन अन्त्य गर्न राष्ट्रपति रामचन्द्र पौडेललाई सिफारिस गर्ने निर्णय गरेको हो। प्रधानमन्त्री ओलीको सम्बोधनपछि यो प्रक्रिया अघि बढ्नेछ।
प्रतिनिधिसभाको आजको बैठकमा सभामुख देवराज घिमिरेले प्रधानमन्त्री तथा मन्त्रिपरिषद्को कार्यालयबाट प्राप्त गरेको पत्र पढेर सुनाउनेछन्। साथै, संसदीय छानबिन समितिले सहकारी संस्था बचत रकम दुरुपयोग सम्बन्धी प्रतिवेदन पेश गर्ने कार्यक्रम पनि रहेको छ।
