समाचार सुन्नुहोस :
काठमाडौँ – सर्वोच्च अदालतले लामो दूरीको यातायात सेवामा कम्तीमा दुईजना चालक राख्न अनिवार्य व्यवस्था गर्न अल्पकालीन अन्तरिम आदेश जारी गरेको छ। सवारी तथा यातायात व्यवस्था ऐन, २०४९ को दफा १०४ अनुसार लामो यात्रामा सार्वजनिक सवारीमा चालक परिवर्तन गर्नुपर्ने नियम कार्यान्वयन गर्न अदालतले आदेश दिएको हो।
साथै, ऐनको दफा १०२ अनुसार, सिट क्षमताभन्दा बढी यात्रु नचढाउन र सवारीभित्र यात्रुको इच्छाविपरीत ठूलो आवाजमा संगीत बजाउन नदिन पनि अदालतले निर्देशन दिएको छ। मोटरसाइकल चालकहरूले सडकमा आतंक फैलाउने गरी तीव्र गति र ठूलो स्वरमा मोटरसाइकल नचलाउन र १८ वर्षमुनिका बालकलाई परिचालकको रूपमा नलगाउन पनि अदालतले आदेश जारी गरेको छ।
