समाचार सुन्नुहोस :
काठमाडौँ – चालु आर्थिक वर्ष २०८१–८२ को पहिलो महिना साउनमा ५९ हजार ५७५ जना नेपालीले वैदेशिक रोजगारका लागि देश छोडेका छन्। बैदेशिक रोजगार विभागले सार्वजनिक गरेको साउन महिनाको तथ्यांकअनुसार सो संख्याका कामदारले श्रम स्वीकृति प्राप्त गरेका छन्। साउनमा ३६ हजार ९२८ जनाले पहिलो पटक वैदेशिक रोजगारका लागि श्रम स्वीकृति लिएका छन्। गत वर्षको साउन महिनामा ५५ हजार ५७५ जनाले वैदेशिक रोजगारीको स्वीकृति लिएका थिए। जसको आधारमा यस वर्ष वैदेशिक रोजगारमा जानेहरूको संख्या ७.१९ प्रतिशतले वृद्धि भएको छ।
गत आर्थिक वर्षभरमा नेपालबाट ७ लाख ४१ हजार २९७ जना कामदारले वैदेशिक रोजगारीका लागि श्रम स्वीकृति प्राप्त गरेका थिए। समीक्षा महिनामा ९३ देशमा नेपाली कामदार रोजगारीका लागि गएका छन। जसमा सबैभन्दा बढी १७ हजार ५४१ जना युएई पुगेका छन् तीमध्ये १२ हजार २३८ जना नयाँ कामदार हुन्। दोस्रो स्थानमा साउदी अरब रहेको छ।जहाँ ११ हजार ८०९ जना कामदार गएका छन। तीमध्ये ६ हजार ९०० जना नयाँ कामदार हुन्।
तेस्रो स्थानमा कतार रहेको छ। जहाँ ११ हजार ७८५ जना नेपाली कामदार पुगेका छन। तीमध्ये ३ हजार ७६३ जना पहिलो पटक वैदेशिक रोजगारमा गएका हुन्। अन्य देशहरूमा कुवेतमा ४ हजार ६९५ जना, रोमानियामा २ हजार २९८ जना, जापानमा १ हजार ५७२ जना, मलेसियामा १ हजार ३४४ जना, कोरियाामा १ हजार १३८ जना, माल्दिभ्समा ८७८ जना नेपाली कामदार पुगेका छन्।
