समाचार सुन्नुहोस :
काठमाडौँ – सहकारी संस्थाको बचत रकम दुरुपयोग सम्बन्धी अनुसन्धानको क्रममा संसदीय छानबिन विशेष समितिले पूर्वडीआईजी छविलाल जोशीको बयान शुक्रबार लिने निर्णय गरेको छ। तत्कालीन गोर्खा मिडिया नेटवर्कमा दुई ठूला सहकारी संस्थाको बचत रकम लगानी गरिएको मामिलामा रवि लामिछानेका साझेदार रहेका जोशीलाई शुक्रबार बिहान ११ बजे बयानका लागि बोलाइएको समितिले जनाएको छ।
छविलाल जोशीको बयानपछि पूर्वउपप्रधानमन्त्री तथा गृहमन्त्री रवि लामिछानेलाई पनि बयानका लागि बोलाइने समितिका सभापति सूर्य थापाले जानकारी दिए। गोर्खा मिडिया नेट्वर्कमा छविलाल जोशी, रवि लामिछाने र हाल फरार रहेका गितेन्द्रबाबु राई (जीबी) साझेदार थिए। समितिले भदौ १० गतेसम्म सोधपुछ सक्ने गरी तयारी गरेको छ ।
