‘माइतीको इज्जत जाला भनेर…, बसेकी छु बाबा घर धानेर…’ यसपालिको तीजमा माइती घरमा जान नपाउँदा पीडा सुनाउँदै छिन्, सर्जक तथा गायिका ज्ञानसरा जुग्जाली (छन्त्याल) ।
टोकियो – ज्ञानसराको नयाँ तीज गीत ‘माइतीको इज्जत..’ सार्वजनिक भएको छ । पुरानी गायिका ज्ञानसराकै शब्द, संगीत र स्वरमा रहेको गीत निकै मार्मिक बनेको छ । छोरी मान्छे विवाह गरेर पराइ घर जाँदा तीज र अन्य चाडबाडमा आउने माइतीको सम्झनालाई मौलिक शब्दमार्फत गीतमा प्रस्तुत गरिएको छ । साथी सङ्गी र आफन्तको याद, माइतीमा बिताएका दिन र गीतमा माइती जान नपाएकी चेलीको भावनालाई गीतले बोलेको छ ।
कर्म घरको व्यस्तता र बाध्यताले जन्मघर जान नपाउँदाको भावलाई बोलेको गीत दर्शक-श्रोताले मन पराउने अपेक्षा गरिएको छ । पुरानो भाका र टिपिकल शब्दसहितको मौलिक गीत उत्कृष्ट बनेको छ । गीतको म्युजिक भिडिओमा पनि गायिका ज्ञानसरालाई नै देख्न सकिन्छ । ***
