समाचार सुन्नुहोस :
काठमाडौँ – जारी युरोकपको सेमीफाइनलको पहिलो खेल आज राति हुँदैछ। पहिलो सेमिफाइनलमा स्पेन र फ्रान्स प्रतिस्पर्धा गर्दैछन्। नेपाली समय अनुसार यो खेल राति १२:४५ बजे सुरु हुनेछ। स्पेनले क्वार्टरफाइनलमा आयोजक जर्मनीलाई २-१ गोल अन्तरले पराजित गर्दै सेमिफाइनलमा स्थान बनाएको छ। त्यस्तै, फ्रान्सले पोर्चुगललाई पेनाल्टी सुटआउटमा ५-३ गोल अन्तरले हराउँदै सेमिफाइनलमा प्रवेश गरेको छ।
स्पेन र फ्रान्सबीच अहिलेसम्म ३६ खेल भएका छन्, जसमा स्पेनले १६ पटक जितेको छ भने फ्रान्सले १३ पटक जितेको छ। दुवै टिमबीचका ७ खेल बराबरीमा टुंगिएका छन्। युरोकपको इतिहासमा स्पेनले तीन पटक उपाधि जितेको छ, सन् १९६४, २००८, र २०१२ मा। त्यस्तै, स्पेन १९८४ मा उपविजेता बनेको थियो। फ्रान्सले भने सन् १९८४ र २००० मा उपाधि जितेको छ भने २०१६ मा उपविजेता बनेको थियो।
