समाचार सुन्नुहोस :
काठमाडौँ – जापान र फिलिपिन्सले सोमबार चीनको क्षेत्रीय पानीमा दाबी बढ्दै गइरहेका बेला सुरक्षा सहयोग सुदृढ गर्नका लागि द्विपक्षीय रक्षा सम्झौतामा हस्ताक्षर गरेका छन्। सम्झौतामा हस्ताक्षर समारोह जापानी विदेश मन्त्री कामिकावा योको र फिलिपिन्सका रक्षा सचिव गिल्बर्ट टिओडोरो जुनियरले राष्ट्रपति फर्डिनान्ड आर. मार्कोस जुनियरको उपस्थितिमा मलाकान दरबारमा सम्पन्न भएको थियो। पारस्परिक पहुँच सम्झौता (आरएए) ले दुई देशबीच संयुक्त अभ्यासलाई सहज बनाउने लक्ष्य राखेको छ।
सम्झौतामा हस्ताक्षर गर्नुअघि राष्ट्रपति मार्कोसले जापानी विदेश मन्त्री कामिकावा र जापानी रक्षामन्त्री मिनोरु किहारासँग भेटवार्ता गरेका थिए। उनले यस सम्झौतालाई दुई देशका लागि महत्वपूर्ण सम्झौता भएको भन्दै कामिकावाले आरएएको हस्ताक्षरले द्विपक्षीय सम्बन्धलाई समृद्ध बनाउने उल्लेखनीय कदम भएको बताए।
सम्बन्धित विधायी निकायहरूले अनुमोदन गरेपछि लागु हुने यस सम्झौताले जापान सेल्फ डिफेन्स फोर्स र फिलिपिन्स सेनाबीच एक अर्काको देशमा संयुक्त अभ्यास र विपद् राहत कार्यका लागि कर्मचारी स्थानान्तरणमा प्रतिबन्धहरू कम गर्ने अपेक्षा गरिएको छ।
गत नोभेम्बरमा जापानी प्रधानमन्त्री फुमियो किशिदा र राष्ट्रपति मार्कोसले वार्ता सुरु गर्न सहमति जनाएपछि यो सम्झौता भएको हो। फिलिपिन्स समाचार एजेन्सीका अनुसार, फिलिपिन्सले संयुक्त राज्य अमेरिका र अस्ट्रेलियासँग यस्तै रक्षा सम्झौता गरिसकेको छ भने फ्रान्ससँग अर्को रक्षा सम्झौता प्रक्रिया भइरहेको छ। जापानले पनि अस्ट्रेलिया र बेलायतसँग यस्तै सम्झौता गरेको छ भने अमेरिकासँग ‘स्टेट्स अफ फोर्सेज एग्रिमेन्ट’ गरेको छ।