काठमाडौं – सहकारीको रकम अपचलन, ठगी र हिनामिना लगायतका विषयमा छानबिनका लागि गठन गर्ने संसदीय समितिको कार्यादेश टुङ्गो लगाउन कार्यदलको बैठक सुरु भएको छ । बैठक कानुन मन्त्रालयमा सुरु भएको हो ।
बैठकमा नमिलेको विषयमा सहमति जुटाउन प्रयास हुनेछ । यसअघि गत आइतबार बसेको कार्यदलको बैठकले कार्यादेशमा सहमति जुटाउन सकेको थिएन । कार्यदलमा प्रमुख प्रतिपक्षी नेपाली कांग्रेसबाट पूर्वमन्त्रीसमेत रहेका सांसद ज्ञानेन्द्रबहादुर कार्की थपिएका छन् ।
कार्यदलमा विशेषगरी गृहमन्त्री रवि लामिछानेको नाम उल्लेख गर्ने कि नगर्ने भन्ने विषयमा विवाद छ । सत्ता र प्रतिपक्ष दलले गत शनिबार सहकारी प्रकरणमा छानबिन गर्न संसदीय समिति गठन गर्ने सहमति भएको थियो । सो सहमति अनुसार समितिको कार्यादेश (टिओआर) टुङ्गो लगाउन कार्यदल गठन गरिएको थियो ।
