इलामको मतगणना बिहान ११ बजेदेखि गर्ने सहमति, सुरक्षा व्यवस्था कडा

समाचार सुन्नुहोस : 

काठमाडौँ – इलाम क्षेत्र नम्बर २ को मतगणना बिहान ११ बजेबाट सुरु गर्ने सहमति भएको छ । बिहान बसेको सर्वदलिय बैठकले ११ बजेबाट मतगणना सुरु गर्ने निर्णय गरेको हो ।

मुख्य निर्वाचन अधिकृत केशवप्रसाद घिमिरेका अनुसार पश्चिम इलामको फाकफोकथुम गाउँपालिकाबाट मत गणना प्रारम्भ हुनेछ । मतगणना स्थलमा सुरक्षा व्यवस्था कडा पारिएको छ । मतगणना स्थलमा तार बेरा गरी सिसी टिभी समेत जडान गरिएको छ । कुल १ लाख १५ हजार ८८९ मतदाता रहेको इलाम–२ मा जम्मा ६९ हजार २ सय ८७ मत खसेको थियो ।

यस क्षेत्रका विकट पालिकाहरुबाट मतपेटिका संकलन गरी मुचुल्का गर्दा आइतवार बिहान २ बजेको थियो । यस क्षेत्रमा चुलाचुली गाउँपालिका, माङसेबुङ गाउँपालिका, फाकफोकथुम गाउँपालिका पुरै तथा इलाम नगरपालिका (१० वडा बाहेक), देउमाई नगरपालिका, माई नगरपालिकाका ६, ७ र ८ वडा गरी ४२ वटा वडा रहेका छन् ।