समाचार सुन्नुहोस :
काठमाडौँ – गोरखाको बारपाक सुलीकोट गाउँपालिकाले वैशाख १२ गते आज बुधवार सार्वजनिक बिदा दिने निर्णय गरेको छ । २०७२ साल वैशाख १२ गते विनाशकारी भूकम्पले गोरखाको बारपाकमा ७.६ म्यागनीच्युडको भूकम्पमा परी दिवङ्गत भएका नागरिकहरूको सम्मान तथा सम्झनामा आज बिदा दिएको गाउँपालिकाका अध्यक्ष विष्णु भट्टले जनाएका छन् ।
गाउँ कार्यपालिका बैठकले बार पाक सुलीकोट गाउँपालिका भित्रका सरकारी कार्यालय, गैरसरकारी कार्यालय विद्यालय तथा बैङ्क तथा वित्तीय संस्थाहरूमा बिदा दिने निर्णय गरेको गाउँपालिकाका अध्यक्षद्वारा हस्ताक्षरित विज्ञप्तिमा भनिएको छ ।
त्यस्तै बार पाक सुलीकोट गाउँपालिकाको वडा न १ मा रहेको श्री हिमालय माविको खेलमैदानमा गाउँपालिकाको तर्फबाट आज दिउँसो ११ः ४५ बजे श्रद्धाञ्जली सभाको आयोजना गरिदैछ ।
