काठमाडौँ – जापानी फिल्म फेस्टिभल २०२४ शुक्रबारदेखि काठमाडौंमा सुरु भएको छ । पोखरामा फेस्टिभल पाँच दिन सम्पन्न भएपछि काठमाडौंमा महोत्सव सुरु भएको हो । शुक्रवारदेखि काठमाडौंमा सुरु भएको दुई दिने यो कार्यक्रममा कुल ५ वटा फिल्म देखाइन्छ भने जापानको पहिरन र लेखाइ पद्दतीको अनुभव नेपालीले नेपालमै गरुन् भन्ने हेतु यो फेस्टिभलको आयोजना गरिएको जापानी राजदूतावासले जनाएको छ । शुक्रबार र शनिबार जमलस्थित राष्ट्रिय नाचघरमा फेस्टिभल चलिरहेको छ । मार्च २० र २१ मा पानीपोखरीस्थित दूतावासको हलमा पनि फेस्टिभल हुनेछ ।
हिजो शुक्रबार केन्जी उचिदा निर्देशित १२५ मिनेट लामो कमेडी फिल्म ‘की अफ लाइफ’ प्रदर्शन गरिएको थियो। शुक्रबार नै ‘स्कुप हन्टर’ समेत स्क्रिनिङ भएको थियो । सन् २०१३ मा रिलिज भएको यो फिल्मले एक पत्रकारको कथा भन्छ जो जापानी नागरिकको जीवन अवस्थाको रेकर्डका लागि समय यात्रामार्फत १६ औं शताब्दीमा फर्किन्छ ।
शनिबार भने यासुकी साकाकीबारा निर्देशित फिल्म ‘सियोरी’ स्क्रिनिङ भैरहेको छ । पिता बिरामी भएर कमजोर बनेपछि मासाया नामक छोराले असहाय महसुस गरेको कथा यसमा छ । शनिबारनै ताकेसी वातानावे निर्देशित फिल्म ‘नेको निन्जा’ स्क्रिनिङ हुँदैछ । आजै अर्को फिल्म ‘कामोमी डिनर’ पनि देखाइँदैछ । 
