बुधबार, बैशाख १२, २०८१
Wednesday, April 24, 2024

समाचार सुन्नुहोस : 

काठमाडौँ – करिब ७० वर्षसम्म ‘फलामको फोक्सो’ को सहारामा बाँचिरहेका पल अलेक्जेन्डरले अन्ततः संसारबाट बिदा भएका छन् । ‘पोलियो पल’ भनेर चिनिने उनको ७८ वर्षको उमेरमा निधन भएको हो। पल अलेक्जेन्डर १९५२ मा ६ वर्षको उमेरमा नै पोलियोबाट पीडित भएका थिए । त्यसले गर्दा उनी आफ्नो टाउको, घाँटी र मुख मात्र चलाउन सक्ने भएका थिए। त्यो समयमा अमेरिकामा पोलियोको व्यापक महामारी थियो। केटाकेटीहरूलाई फलामको फोक्सो राखेर सास फेर्न सक्ने बनाइन्थ्यो।

इकोनोमिक टाइम्सका अनुसार अलेक्जेन्डरको प्राण धिपधिप भएपछि उनी ८ वर्षको हुँदा शरीरमा फलामको फोक्सो राखिएको थियो। फलामको उक्त फोक्सो मेसिनमा भ्यागुतोको श्वासप्रश्वास प्रविधि प्रयोग गरिएको थियो। यसले उनलाई एकपटकमा मुखभरि अक्सिजन लिएर घाँटी हुँदै फोक्सोसम्म धकेल्न मद्दत गर्थ्यो।

अलेक्जेन्डरले ७० वर्षसम्म यसैगरी जीवन बिताए। उनले घरबाटै स्कुल पढे र २१ वर्षको उमेरमा ग्र्याजुएट भए। डालास हाइ स्कुलमा भौतिक कक्षामा उपस्थित नभइ, घरबाटै पढेर ग्र्याजुएट हुने उनी पहिलो विद्यार्थी हुन्। उनले सन् २०२० मा आत्मकथा पनि लेखेका छन्। उनलाई धेरैले ‘प्रेरणाका स्रोत’ मान्छन्।

 

तपाईको प्रतिक्रिया