समाचार सुन्नुहोस :
काठमाडौँ – इन्डोनेशियाको एउटा स्थानीय वायु सेवा बटिक एअरको उडानका क्रममा विमानमा भएका दुवै पाइलट निदाएको घटना सार्वजनिक भएको छ । इन्डोनेसिया सरकारले अहिले यो स्तब्ध पार्ने घटनाको अनुसन्धान गरिरहेको छ । बाटिक एयरको यो विमान गत जनवरी २५ मा राजधानी जकार्ताबाट सुलावेसीका लागि उडेको थियो । उडानका बीचमा दुवै पाइलट निदाए । यो विमान २८ मिनेटसम्म यसरी नै उडिरह्यो । दुई पाइलटमध्ये एक जना आफ्ना नवजात जुम्ल्याहा बच्चाको हेरचाह गर्दा थाकेको बताइएको छ ।
जसका कारण उनी ड्युटीमा बस्दा सुते । दुवै पाइलट निद्रामा परेका कारण विमान केही समय बाटो हरायो तर अन्ततः सकुशल अवतरण गर्न सफल भयो । जहाजमा सवार सबै १५३ यात्रु सकुशल छन् । दुवै पाइलटलाई लापरवाही गरेको आरोपमा अस्थायी रूपमा निलम्बन गरिएको छ ।
यातायात मन्त्रालयको रिपोर्टमा ३२ वर्षीय पाइलटले विमान उडेपछि आफ्ना सहचालकलाई आधा घण्टासम्म विमानलाई नियन्त्रणमा राख्न भनेका थिए । मुख्य पाइलटले आफूलाई आराम चाहिएको बताएका थिए । तर केही समयपछि को-पाइलट पनि निदाए ।
