काठमाडौं – सत्तासाझेदार दल नेकपा (एमाले)का उपाध्यक्ष समेत रहेका सांसद विष्णु पौडेलले नेपाली कांग्रेसप्रति कटाक्ष गरेका छन् । सत्ताबाट हटेपछि कांग्रेस गहिरो पीडामा डुबेको र चोट लागेको उनको टिप्पणी छ ।
बिहीबार प्रतिनिधिसभा बैठकको विशेष समयमा उनले कांग्रेस सांसद रमेश लेखकले भन्दा पछि बोलेका थिए । उनले ‘कति गहिरो पीडा र घाउ लागेको रहेछ भन्ने अभिव्यक्ति लेखकबाट आएको’ बताए । ‘घाउमा मलमपट्टी गर्नका लागि राम्रा डाक्टर साथमा लिएर सहकार्य गर्न प्रमलाई आग्रह गर्दछु र त्यो अभियानमा हाम्रो साथ चाहिए एमाले याद गर्नुहोला,’ उनले भने, ‘उहाँ (रमेश लेखक)ले यो तहको पीडा र छटपटी यो तहको आक्रोश र बेचैनी प्रहार गर्नुपर्ने थिएन ।’
नेपालको संविधानले दलहरूबीच गठबन्धनलाई स्वाभाविक मानेको उनले उल्लेख गरे । कुनै दलहरूका बीचमा सरकार निर्माण र सञ्चालनको कार्य सामान्य भएको उनले बताए । ‘कि त गठबन्धन बनाउन पाइन्छ केवल नेपाली कांग्रेससँग मात्र गठबन्धन गर्नुपर्छ भन्ने लेख्नुपर्दथ्यो । यो परिवर्तनलाई एउटा ओठे अभिव्यक्ति हैन, साधारण र स्वाभाविक संसदीय अभ्यासको रूपमा लिनुपर्छ । त्यही रूपमा ग्रहण गर्नुपर्छ,’ उनले भने ।
पौडेलले ‘एउटा नेतामा यति पीडा छ भने सिंगो कांग्रेसीमा कति होला ?’ भन्दै कटाक्ष गरे । ‘३८ मिनेटमा त्यो तहको पीडा भयो होला, एउटा नेताको मनमा यति पीडा छ भने कांग्रेसको मनमा कति पीडा होला ?,’ उनले भने ।
