काठमाडौं – अनलाइनमार्फत झण्डै ५० लाख रुपैयाँ ठगी गरेको आरोपमा प्रहरीले काठमाडौँबाट चार युवकलाई पक्राउ गरेको छ । प्रहरीको काठमाडौँ उपत्यका अनुसन्धान कार्यालयले उनीहरुलाई विभिन्न स्थानबाट पक्राउ गरेको हो ।
पक्राउ पर्नेहरुमा सर्लाहीको विष्णु गाउँपालिका-४ का २० वर्षीय सिद्धार्थकुमार सिंह, सोही ठाउँकै २१ वर्षीय आदित्यकुमार सिंह, बाराको कलैया उपमहानगरपालिका-११ का २२ वर्षीय राम सेवक रामर पर्साको वीरगञ्ज महानगरपालिका-१५ का २४ वर्षीय आकाश साह सोनार छन् । सामाजिक सञ्जाल फेसबुक, ह्वाट्स एप, इमो, भाइबर, टिकटक, इन्स्टाग्राम लगायत एपहरुको प्रयोग गरी उनीहरु ठगी गरेको गरेको भन्दै उजुरी परेको थियो ।
सामाजिक सञ्जालमा अकाउन्ट खोल्ने र साथी बनाई कुराकानी गर्ने, त्यसपछि विभिन्न प्रलोभन देखाएर रकम माग गर्ने तथा डिपोजिट गर्न लगाएर ठगी गरेको प्रहरीले जनाएको छ । उनीहरुले महँगो ब्राण्डका मोबाइलहरु सस्तोमा खरिद बिक्री गर्ने बताउँदै भिडिओ समेत बनाएर सामाजिक सञ्जालमा पोस्ट गर्दै विश्वास दिलाएर ठगी गर्ने गरेका थिए ।
यसरी उनीहरुले ५ जनाबाट मात्रै ४९ लाख ५८ हजार ८ सय रुपैयाँ ठगी गरेको भन्दै उजुरी परेको थियो । उनीहरुले एटिएममार्फत पनि रकम भुक्तानी गर्ने गरेको अनुसन्धानबाट खुलेको छ ।
